Detaje të reja janë zbardhur nga aksidenti i rëndë, i ndodhur paraditen e sotme në Korçë, ku një 14-vjeçare u pëprlas për vdekje.
Rreth orës 11:00, në aksin rrugor “Korçë-Bilisht”, pranë kryqëzimit të fshatit Zëmblak, Maliq, automjeti tip “Opel” me drejtues shtetasin I. K., ka përplasur një shtetase 14-vjeçare, këmbësore në rrugë, e cila për pasojë ka humbur jetën.
Ngjarja raportohet se ka ndodhur në Maliq, pranë rrethrrotullimit të fshatit Zëmblak, ku vajza është përplasur nga një makinë sapo ka zbritur nga një fugon.
Zona në fjalë njihet si një ndër njollat e zeza të aksidenteve rrugore për shkak se mjetet ecin me shpejtësi të lartë dhe shpesh përgjatë saj ka zona të banuara. Momentalisht, për rastin policia ka shoqëruar drejtuesin e automjetit dhe po bën pyetjen e dëshmitarëve mbi këtë ngjarje, gjithashtu dhe veprimet e tjera hetimore.
Nga të dhënat në vendngjarje, shkak i aksidentit dyshohet se mund të ketë qenë shpejtësia e lartë e automjetit që përplasi vajzën.
Më drejtuesin e automjetit po kryhen veprimet e mëtejshme procedurale. Grupi hetimor po punon për sqarimin e rrethanave të aksidentit.
