Mëngjesi i së enjtes agoi me lajmin se këngëtarja e njohur Teuta Selimi ka kërkuar ndihmën e Policisë së Kosovës, dy herë brenda 48 orëve, duke e denoncuar fillimisht bashkëshortin e më pas edhe vëllain.
Rasti i parë u raportua në orët e para të së mërkurës, kur Teuta Selimi, në pikë të mëngjesit e raportoi për dhunë burrin e saj, Patrik Neziri.
Burimet brenda Prokurorisë kanë bërë me dije se një konflikt verbal mes çiftit dyshohet se eskaloi në dhunë fizike, ashtu që i dyshuari e kishte goditur disa herë Teutën në kokë.
Denoncimi i këngëtares e aktivizoi Policinë por prokurori i Shtetit nuk ka urdhëruar masën e ndalimit policor, duke e liruar Patrik Nezirin në procedurë të rregullt.
Të njëjtat burime kanë bërë me dije ekskluzivisht se këngëtarja Selimi ka kërkuar ndihmë nga Policia edhe mbrëmë pas mesnate.
Teuta Selimi e ka raportuar këtë herë vëllanë e saj, Agron Selimin, për dhunë në familje.
Sipas informacioneve të para, bazuar në dëshminë e saj, i dyshuari e ka sulmuar fizikisht për shkak të një debati lidhur me rastin që e kishte denoncuar një ditë më parë.
Policia është vënë në lëvizje dhe ka marrë në pyetje palët e përfshira në rast dhe më pas është vënë në dijeni edhe Prokurori i Shtetit.
Me vendim të prokurorit, vëllai i këngëtares është dërguar në paraburgim për 48 orë dhe i është ngarkuar akuza e veprës penale “Dhuna në familje”, sipas mediave.
Ende nuk është vërtetuar fajsia e tyre nga prokuroria e Kosovës.
