Kryeministri spanjoll Pedro Sanchez tha të mërkurën se po shqyrtonte mundësinë e dorëheqjes pasi një gjykatë hapi një hetim për mashtrim ndaj gruas së tij.
“Më duhet të bëj pauzë dhe të mendoj”, tha Sanchez në një letër të shpërndarë në platformën e mediave sociale X, duke njoftuar se ai do të pezullonte detyrat e tij publike deri të hënën, kohë në të cilën do të ketë marrë një vendim.
“Kam nevojë urgjente për një përgjigje në pyetjen nëse… duhet të vazhdoj të drejtoj qeverinë apo të heq dorë nga ky nder”, ka shkruar ai.
Pse po hetohet gruaja e Pedro Sanchez?
Njoftimi erdhi pasi një gjykatë spanjolle tha më herët të mërkurën se po fillonte një hetim paraprak nëse Begona Gomez kishte abuzuar me pozicionin e saj si bashkëshorte e Kryeministrit për të siguruar sponsorë të dyshuar për një kurs masteri universitar që ajo drejtonte.
Gomez, 49 vjeçe, nuk mban poste publike dhe mban një profil të ulët politik.
Gjykata tha se kishte hapur hetimin për “shpërdorimin e ndikimit dhe korrupsion” në përgjigje të një ankese nga grupi i presionit kundër korrupsionit Manos Limpias (“Duart e Pastra”), kreu i të cilit ka lidhje me të djathtën ekstreme.
Kryeministri socialist Sanchez, i cili sapo ka formuar një qeveri të re të koalicionit të majtë pasi ofroi amnisti për separatistët katalanas në mërgim, tha në letrën e tij se ankesa bazohej në fakte “inekzistente” dhe ishte pjesë e një fushate “ngacmimi” kundër gruas së tij e udhëhequr nga media “ultrakonservatore” dhe e mbështetur nga opozita konservatore dhe e ekstremit të djathtë.
“Unë nuk jam naiv. Jam i vetëdijshëm që ata po ngrenë akuza kundër Begonës, jo sepse ajo ka bërë ndonjë gjë të paligjshme, sepse ata e dinë mirë se kjo nuk është e vërtetë, por sepse ajo është gruaja ime”, shtoi ai.
Ndërsa Manos Limpias e përshkruan veten si një sindikatë, aktiviteti i saj kryesor është ndjekja e çështjeve ligjore, shumë të lidhura me kauza të krahut të djathtë, si një e ashtuquajtur “prokurori popullore”.
Kjo veçori e ligjit spanjoll i lejon individët ose subjektet të marrin pjesë në çështje të caktuara penale edhe kur nuk janë dëmtuar drejtpërdrejt nga i akuzuari.
Ministri i Drejtësisë i Sanchezit, Felix Bolanos, i quajti akuzat kundër Gomezit “të rreme”.
I pyetur në Parlament nëse mendon se sistemi gjyqësor po funksionon në dritën e vendimit të gjykatës, Sanchez u përgjigj: “Në një ditë si kjo e sotmja dhe pasi dëgjova lajmet, pavarësisht gjithçkaje, unë ende besoj në sistemin gjyqësor të këtij vendi”.
