Shqiptarët po heqin dorë nga pasaporta e vendit të tyre, me qëllim që të fitojnë atë të vendeve të zhvilluara europiane.
Të gjendur përballë zgjedhjes së një pasaporte të vetme, shqiptarët kanë vendosur atë që iu ofron jetesë më të mirë. Bazuar në të dhënat e Ministrisë së Brendshme, në Shqipëri në 9 muajt e parë të vititi 692 shqiptarë braktisën shtetësinë e tyre.
Pra 189 më shumë krahasuar me të njëjtën periudhë të një viti më parë.
Raportohet se të rinjtë janë ata që morën masivisht këtë vendim, ndërsa grupmosha më dominuese është 20-49 vjeç. Pra siç evidentohet, pasaportën shqiptare po e lënë mosha më aktive për punë.
“Të paktë janë shtetet të cilat të lejojnë dy nënshtetësinë. Normalisht shteti i cili të pret pretendon që të lini shtetësinë tuaj e të përfitoni atë të vendit ku jetoni.
Marrja e nënshtetësinë është një procedurë e tejzgjatur dhe personat e kualifikuar kanë përparësi. Mund të shkoj ky proces deri në 7-8 vjet”, u shpreh Rafael Todhe, jurist në Gjermani.
Një sërë lehtësirash i detyrojnë shqiptarët të braktisin nënshtetësinë e tyre. “Nuk përfitojnë nga shumë përparësi që shtetet japin. Nëse e marrin atë janë shtetas europian dhe përfitojnë së pari lëvizjen e lirë, ndryshimin e vendbanimit. Pjesa më e madhe që i shtynë janë 3 indikatorë një punë më e mirë arsim më i mirë shëndetësi më e mirë”, tha Eldisa Cirogu, studiuese e emigracionit.
Ekspertët e emigracionit e konsiderojnë lënien e nënshtetësisë shqiptare si “vulë” e braktisjes së vendit. Sigurisht që kjo sjell pasoja negative për vendin tonë, pra largim i forcës punëtore, tkurrje ekonomike, tkurrje demografike dhe plakje më e shpejtë e popullsisë.
Ndërkohë që kërkesat e të huajve për fitimin e shtetësisë shqiptare janë në rritje. Në vitin 2023 ky numër është dyfishuar, duke arritur në 1 mijë e 126 shtetas deri në shtator.
