Gjatë fotos familjare të një takimi të Ministrave të Brendshëm dhe të Jashtëm europianë të mbajtur në Berlin kreu i diplomacisë kroate Gordan Grlic-Radman tentoi “të puthte në buzë” kolegen e tij gjermane Annalena.
Aktivistët e të drejtave të grave akuzojnë Grlic-Radman për mosrespektim e deri në ngacmim seksual.
“E pakëndshme për tu parë”. Kështu e komentojnë gazetat kroate dhe boshnjake momentin në të cilin ministrja gjermane largohet në mënyrë të pakëndshme nga kroati, shkruan e përditshmja kroate “Jutarnji list”.
Aktivistja për të drejtat e grave Rada Boriç foli për një “gjest krejtësisht të papërshtatshëm”, ndërsa një tjetër aktiviste e akuzoi ministrin për mungesë mirësjelljeje dhe respekti.
Ivana Kekin, një anëtare e parlamentit, tha se Grlic-Radman jo vetëm që kishte turpëruar veten, por të gjithë kroatët. Ish-kryeministrja kroate Jadranka Kosor gjithashtu kritikoi ministrin, duke shkruar se “puthja me forcë e grave quhet edhe dhunë, apo jo?”, ndërsa disa të tjerë e kanë cilësuar si ngacmim seksual.
Ndërkohë, Grlic-Radman i hodhi poshtë akuzat dhe në një konferencë për shtyp pretendoi se dëshironte të përshëndeste një kolege në mënyrë “humane”, duke qenë se “ministrat gjithmonë përshëndesin njëri-tjetrin ngrohtësisht”. Megjithatë, ministri kërkoi falje për gjestin e tij ndaj kujtdo që ndihej i ofenduar.
