Gjykata e Lezhës i ka caktuar masën e sigurisë ‘arrest shtëpie’ 16-vjeçarit që goditi dy ditë më parë mësuesen me karrige.
Mësohet se gjatë seancës së sotme, trupa e gjykimit ka vendosur që adoleshenti të lihet në arrest shtëpie. Ndërkohë që ndaj tij rëndojnë dy akuza, goditje për shkak të detyrës dhe plagosje e rënde me dashje.
Gjithashtu, raportohet se mësuesja Majlinda Palushi, ditën e sotme i është nënshtruar një operacioni në klavikul në spitalin e Traumës.
Ajo ndodhet jashtë rrezikut për jetën dhe në gjendje të mirë shëndetësore. Mësuesja ka marrë fraktura të shumta si pasojë e sulmit dhe është kërkuar që ajo të marrë trajtim të specializuar.
Kujtojmë se ajo u godit gjatë orës së mësimit nga një nxënësi i moshës 16-vjeçare, i cili është arrestuar nga policia. Shkak i dhunës mësohet se ka qenë një frazë e mësueses që ka irrituar nxënësin.
“Betohem për kockat e babait tim që më ka vdekur dhe babait tënd që është aty tek i imi që do të të ngel”, është shprehur ajo.
Pasi i ka përmendur babain që nuk jeton më, 16-vjeçari është rebeluar dhe ka marrë karrigen dhe goditur mësuesen para nxënësve të tjerë.
Adoleshenti u ndalua në praninë e psikologut, prindërve të tij dhe avokatëve. Ndaj tij rëndojnë akuzat për veprat penale “Plagosja e rëndë me dashje” dhe “Goditjet për shkak të detyrës”.
