Universiteti i Mjekësisë ka njoftuar koston e studimit prej 2300 eurosh në vit, që do duhet të paguajnë studentët e këtij fakulteti, nëse refuzojnë të firmosin kontratën që i detyron të punojnë për 5 vite në Shqipëri pas diplomimit.
Edhe pse tarifa është më e ulët nga c’ishte llogaritur fillimisht në projektligjin e qeverisë, studentët kanë dalë sërish në protestë, për të disatën ditë radhazi.
Ata e nisën protestën në ambientet e fakultetit dhe më pas janë nisur drejt Ministrisë së Arsimit, duke patur një rritje në numër të të rinjve, cka tregon se protesta e tyre po merr gjithnjë e më shumë mbështetje.
Me pankarta dhe thirrje të ndryshme, që rikujtojnë protestën e studentëve të disa viteve më parë, të rinjtë kërkojnë anulimin e ligjit që i detyron të punojnë në Shqipëri pas studimeve ose në të kundërt të paguajë tarifën e plotë të shkollimit, teksa shprehen se gjithsesi duan t’i shërbejnë vendit të tyre, por pa ju hequr lira.
Marshimi i tyre ishte i shoqëruar me thirrje si: “Nuk dorëzohemi para padrejtësisë”, ndërsa duket se nuk do të ndalet, derisa të paktën të ketë negociata me ta.
